Die kursusse wat gebied word is prakties en daarop gemik om basiese vaardigheid te ontwikkel wat die grondslag vorm van verhoog-, radio-, film-, televisie-, en alle vorms van openbare optrede.

By die Akademie van Dramakuns word van ‘n student verwag om gereeld klasse by te woon en soos in die geval van enige deeltydse kursus is dit noodsaaklik dat voorbereiding gereeld tuis gedoen moet word, soos deurgegee deur die ADK dosente.

Aan die einde van die kursus word ‘n Professionele Lisensiaat Sertifikaat in Drama aan die volwasse studente wat slaag uitgereik, ‘n NQF Vlak 4 Sertifikaat in Drama aan hoërskool studente, en ‘n Drama Sertifikaat aan laerskool studente.

Die dosente behou die reg voor om enige student wat sonder ‘n grondige rede meer as twee keer per kwartaal van ‘n individuele- of groepsklas afwesig is eksamentoelating te weier.

‘n Skriftelike kontrak word tussen die ADK en die student aan die begin van die jaar gesluit.

Onder “individuele” word bedoel individuele aandag, maar saam met ander studente in die klas. Die onderrig word aangepas by, en bepaal deur, die behoeftes van die student. Daar word gekonsentreer op die vertolking van poësie, prosa, gedramatiseerde werke, en die ontwikkeling van stemgebruik, waarnemings-vermoë, asook liggaamshouding en beweging.

Die Akademie vir Dramakuns bied drama opleiding vir alle ouderdomme.

Vir volwasse studente:

Die ADK se drama-opleiding vir volwasse studente behels ‘n driejaar kursus wat strek vanaf Februarie tot November, wanneer eksamens afgelê word. Aan die einde van die 3 jaar word ‘n Professionele Lisensiaat Sertifikaat toegeken.

Onderrig vind plaas gedurende die skool- en universiteitskwartale van die Gautengse Onderwysdepartement en behels:

• individuele klasse (maksimum van drie studente per klas) een uur per week

• groepsklasse (repetisies van toneelstukke) een uur per week of ‘n eenmalige maandklas van vier ure (slegs vir Senior ADK studente)

Vir hoërskool studente:

Die ADK se drama-opleiding vir hoërskool studente strek vanaf Februarie tot November, wanneer eksamens afgelê word. Aan die einde van hulle opleiding verkry die studente ‘n NQF Vlak 4 Sertifikaat in Drama.

Onderrig vind plaas gedurende die skool- en universiteitskwartale van die Gautengse Onderwysdepartement en behels:

• groepsklasse wat individueel aan almal aandag verleen, een uur per week

Vir laerskool studente:

Die ADK se drama-opleiding vir laerskool studente strek vanaf Februarie tot November, wanneer eksamens afgelê word. Aan die einde van hulle opleiding verkry die studente ‘n Drama Sertifikaat.

Onderrig vind plaas gedurende die skool- en universiteitskwartale van die Gautengse Onderwysdepartement en behels:

• groepsklasse wat individueel aan almal aandag verleen, een uur per week

Algemeen:

'n Klaspunt wat bestaan uit klasbywoning, werksvermoë, dissipline, en samewerking word jaarliks bereken. Eksterne eksaminators word gebruik.

Die spraak- en vertolkingsprogram word elke jaar herhaal, maar die materiaal word jaarliks moeiliker en meer uitdagend.